Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Նարեկ Կազազյանի մենահամերգը՝ Վանաձորում
06.05.2013
Մայիսի 3-ին «Լոռու մշակույթ, սպորտ և երիտասարդություն» հիմնադրամի և մարզպետ Արթուր Նալբանդյանի աջակցությամբ Վանաձորի Էդ. Կզարթմյանի անվան երաժշտական դպրոցում տեղի ունեցավ տաղանդավոր, բոլորին քաջ հայտնի երաժիշտ, քանոնահար Նարեկ Կազազյանի մենահամերգը: Համերգը վարում էին դերասան, ասմունքող Ջիվան Սարգսյանը և Լոռու մարզպետարանի մշակութային միջոցառումների կազմակերպիչ Մարգարիտա Կիրակոսյանը։
«Ես այսօր շատ ուրախ ու հպարտ եմ Նարեկի հաջողություններով: Նրա հաջողությունները մշտապես ուղեկցվել են մեր աղոթքներով»,- ասաց Վանաձորի Սուրբ Գրիգոր Նարեկացի եկեղեցու հոգևոր հովիվ տեր Վահան քահանա Ազարյանը:
Դահլիճը լի էր հանդիսականներով, ովքեր մեծ սիրով ունկնդրում էին Նարեկի կատարումները: Ինչպես նշեց նրա ուսուցչուհի Անուշ Բարխուդարյանը, համերգը վաղուց սպասված հանդիպում էր Նարեկի երկրպագուների հետ:
Համերգը բաղկացած էր երկու մասից: Ներկայացվեցին հայ և արտասահմանյան դասակաների գործերից։ Նվագակցում էին Անուշ Բարխուդարյանը (դաշնամուր), Վազգեն Փաշիկյանը (դհոլ), Ռիտա Յարալյանը (թավջութակ), Գեղեցիկ Բարսեղյանը (թառ), Սարգիս Ալեքսանյանը (շվի), Վահան Բարսեղյանը և Աշոտ Գասպարյանը (դուդուկ):
«Այսօր մեծ հպարտությամբ եմ խոսում Նարեկի մասին, ում ճանաչել եմ 2000 թվականից: Շատ ուրախ եմ, որ Նարեկն անցել է նման ստեղծագործական ուղի»,- ասաց Վանաձորի քաղաքապետ Սամվել Դարբինյանը:
«Շնորհակալ եմ բոլոր աջակիցներին՝ համերգը կազմակերպելու համար»,- հուզմունքով նշեց տիկին Մարիամը` Նարեկի մայրիկը:
