Տեղեկատվական կենտրոն
Նորություններ
ՀՀ տարածքային կառավարման փոխնախարարի և Լոռու մարզպետի խորհրդակցությունը՝ նվիրված հարկերի և տուրքերի հավաքագրման ընթացքին
19.04.2013
ՀՀ տարածքային կառավարման փոխնախարար Վաչե Տերտերյանը և Լոռու մարզպետ Արթուր Նալբանդյանն ապրիլի 17-ին Լոռու մարզպետարանում հերթական աշխատանքային խորհրդակցությունն անցկացրեցին փոխմարզպետների, մարզպետարանի ֆինանսական և սոցիալ-տնտեսական վարչության, ՏԻ և ՀԳՄ վարչության աշխատակիցների, համայնքների ղեկավարների մասնակցությամբ:
Խորհրդակցությանը հրավիրված էին հիմնականում այն համայնքների ղեկավարներն, ովքեր առավել ցածր ցուցանիշ են ապահովել սեփական եկամուտների, այդ թվում՝ հողի հարկի, գույքահարկի, տեղական տուրքերի հավաքագրման, հողի և գույքի վարձակալության վճարների գծով: Վ. Տերտերյանը նշեց, որ Լոռու մարզում վիճակը բարվոք չէ հատկապես հողի հարկերի հավաքագրման առումով. 50 տոկոսից ցածր ցուցանիշ են ապահովել Սարչապետը, Մեղվահովիտը, Այգեհատը, Նովոսելցովոն, Դաշտադեմը, Մեծ Այրումը և այլ համայնքներ: Համայնքների ղեկավարները խոստացան առաջիկայում շտկել իրավիճակը:
-Լոռու մարզն ընդհանուր առմամբ վատ ցուցանիշներ չի ապահովում, սակայն պետք է ջանքեր գործադրվեն տեմպերը չթուլացնելու համար,- ասաց փոխնախարարը:
Նա հորդորեց լուրջ ուշադրություն դարձնել կառավարության աջակցությամբ գյուղական համայքներին տրվող դիզվառելիքի և սերմացուի բաշխմանը, որպեսզի դրանք օգտագործվեն ըստ նշանակության: Ա. Նալբանդյանը վստահեցրեց, որ գործընթացը խստորեն վերահսկվում է:
Վ. Տերտերյանն անդրադարձավ նաև համայնքապետարաններում տեղեկատվական համակարգերի տեղադրման անհրաժեշտությանը, քանի որ տարեցտարի ավելանալու են էլեկտրոնային եղանակով իրականացվող գործառույթները:
Համայքների ղեկավարները հնարավորություն ունեցան իրենց հուզող հարցերն ուղղել տարածքային կառավարման փոխնախարարին:
Վ. Տերտերյանը խորհրդակցության ավարտին հաճելի անակնկալ մատուցեց 1994-2012 թ.թ. Ապավենի համայնքը ղեկավարած Նարինե Սուղյանին, շնորհակալություն հայտնեց նրան ներդրած ավանդի համար՝ հանձնելով շնորհակալագիր և ծաղկեփունջ Եվրամիության և ՄԱԿ-ի Հայաստանյան գրասենյակների, Տարածքային կառավարման նախարարության կողմից: