Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Մի շարք նախարարություններ ստանձնել են Լոռու մարզի 21 համայնքների «շեֆությունը»
15.04.2013
Մարզպետ Արթուր Նալբանդյանն ապրիլի 15-ին անցկացրեց հերթական աշխատանքային խորհրդակցությունը, որի ընթացքում քննարկվեցին մարզի համար կարևոր մի շարք հարցեր:
Մարզի ղեկավարը նշեց, որ մի շարք համայնքներ գույքային և հողային բազաների վարման հետ կապված դժգոհություններ են արտահայտել: Խնդիրն այն է, որ բազաները ներկայումս վարում են այլ կազմակերպություններ, մինչդեռ հատկապես խոշոր համայնքները առաջարկում են այդ գործառույթը հանձնել իրենց, որովհետև բավականին անճշտույթուններ կան բազաներում, ինչն էլ ունենում է իր անցանկալի հետևանքները: Ա. Նալբանդյանը ֆինանսական և սոցիալ- տնտեսական, ՏԻ և ՀԳՄ վարչություններին, փոխմարզպետներին հանձնարարեց ուսումնասիրություններ կատարել և առաջարկություններ ներկայացնել:
Սեփական եկամուտների հավաքագրման ցուցանիշները դարձյալ չեն գոհացնում: Մարզպետարանի ֆինանսական և սոցիալ-տնտեսական զարգացման վարչության պետ Սևակ Հովհաննիսյանը ներկայացրեց սեփական եկամուտների հավաքագրման ցուցանիշները: Ապրիլի 12-ի դրությամբ սեփական եկամուտների կատարողականը պլանի դիմաց կազմել է 36 տոկոս, գույքահարկինը՝ 25 տոկոսը, հողի հարկինը՝ պլանի նկատմամբ 20 տոկոս է:
Քաղաքաշինության վարչության պետ Արմեն Ջանազյանի տեղեկացմամբ, պետբյուջեի կողմից ֆինանսավորվող չորրորդ հրատապ ծրագիրն ընթանում է բնականոն հունով: Շինաշխատանքներն սկսված են ծրագրում ընդգրկված գրեթե բոլոր համայնքներում: Սկսված են նաև ասֆալտապատման նախապատրաստական աշխատանքները բոլոր տարածաշրջանային կենտրոններում:
Մարզպետը տեղեկացրեց, որ ՀՀ կառավարությունը որոշում է կայացրել նախատեսվող հինգերորդ հրատապ ծրագրից նախապես 300 մլն-ական դրամ հատկացնել Վանաձոր և Գյումրի քաղաքներին՝ ասֆալտապատման և փողոցների բարեկարգման աշխատանքներ իրականացնելու համար: Վանաձորին տրվելիք գումարով կբարեկարգվեն հիմնականում կենտրոնական փողոցները: Առաջիկայում կհստակեցվեն անելիքները:
Այս շաբաթ ևս մարզի ղեկավարը շրջայց կկատարի համայնքներում ՝ ծանոթանալով իրականացվող աշխատանքներին:
Նա տեղեկացրեց նաև, որ մի շարք նախարարություններ ստանձնել են Լոռու մարզի 21 համայքների «շեֆությունը», ինչը ենթադրում է, որ այդ նախարարությունները պարտավորվել են պարբերաբար որոշակի աջակցություն ցուցաբերել այդ համայնքներին:
