Պաշտոնական էլ. փոստ

(միայն www.e-citizen.am համակարգով ծանուցումների համար)

Տպել

Տեղեկատվական կենտրոն

Նորություններ

Նախագահ Սերժ Սարգսյանն աշխատանքային այցով Լոռու մարզում էր

05.11.2011

Նախագահ Սերժ Սարգսյանն այսօր աշխատանքային այցով մեկնել է Լոռու մարզ: Սպիտակ քաղաքում Հանրապետության ղեկավարն այցելել է բազմաճյուղ տնտեսություն վարող «Ագրոհոլդինգ Արմենիա» ընկերություն: Նախագահը շրջել է համալիրում, ծանոթացել «Ագրոհոլդինգ Արմենիա»-ի գործունեության ուղղություններին և ծրագրերին, ընկերության ղեկավարության հետ քննարկել «Ագրոհոլդինգ Արմենիա»-ի զարգացման ծրագրերը:

«Ագրոհոլդինգ Արմենիա» ՍՊԸ-ն, որը հիմնադրվել է 1989թ. սահմանամերձ Դարիկ գյուղում (Ամասիայի տարածաշրջան), իր գործունեության 21 տարիների ընթացքում հետևողականորեն ներդրել է հողի մշակման, ցանքսի, կենդանիների տոհմային որակյալ ցեղատեսակների բուծման և խնամքի, կաթի վերամշակման, ինչպես նաև կերերի արտադրության նոր տեխնոլոգիաներ, իրականացրել ժամանակակից տեխնիկասարքավորումների ներկրում, նախատեսում է նաև տեղում գյուղտեխնիկայի հավաքման և նորոգման ծրագրերի իրականացում: Ընկերությունը գործունեություն է ծավալում Հայաստանի 4 մարզերում` սեփական և վարձակալած շուրջ 1,620 հա ընդհանուր տարածքում, Դարիկ, Սպիտակ, Ղազանչի, Արագածավան, Հրազդան, Եղվարդ համայնքներում: Հանրապետության ղեկավարին շրջայցի ժամանակ ներկայացվել է, որ «Ագրոհոլդինգ Արմենիա»-ն մինչ այսօր շուրջ 11մլն ԱՄՆ դոլարի մեծածավալ ներդրումներ է կատարել արտադրության արդիականացման և ժամանակակից տեխնոլոգիաների ներդրման ուղղությամբ:

Սպիտակ քաղաքում Նախագահն այցելել է նաև Ալ. Մյասնիկյանի անվան թիվ 1 միջնակարգ դպրոց, ծանոթացել դպրոցի նորակառույց մասնաշենքի պայմաններին:

Նշվել է, որ Հայաստանում «Լինսի» հիմնադրամի ֆինանսավորմամբ 2010թ. հուլիսից մեկնարկած «Դպրոցաշինություն» ծրագրի շրջանակներում երկրորդ փուլում (ընդհանուր արժեքը կազմում է շուրջ 11 մլն. ԱՄՆ դոլար) իրականացվել է Լոռու մարզի Սպիտակ, Ստեփանավան և Վանաձոր քաղաքների հանրակրթական դպրոցների մասնաշենքերի հիմնանորոգում: 570 աշակերտի համար նախատեսված Սպիտակի թիվ 1 դպրոցի երեք ուսումնական մասնաշենքերում ամբողջությամբ իրականացվել են տանիքի ծածկույթի, ներքին հարդարման, դռների, պատուհանների, սանհանգույցների, ջեռուցման, ներքին էլեկտրամատակարարման, ջրամատակարարման ներքին ցանցերի աշխատանքները:

Նախագահի շրջայցի ավարտին Սպիտակ քաղաքի թիվ 1 դպրոցի դահլիճում տեղի է ունեցել 1988թ. ավերիչ երկրաշարժի հետևանքով Սպիտակի տարածաշրջանի անօթևան մնացած 150 շահառու ընտանիքների համար կառուցված բնակարանների հավաստագրերի հանձնման արարողությունը:

Ստեփանավանում Սերժ Սարգսյանն այցելել է Վ. Թեքեյանի անվան թիվ 6 միջնակարգ դպրոց, շրջել դպրոցի նորակառույց մասնաշենքում: Հանրապետության ղեկավարը դիտել է նաև այցի ընթացքում դպրոցում անցկացվող շախմատի մրցաշարը:

Նախագահին ներկայացվել է, որ 360 աշակերտի համար նախատեսված Ստեփանավանի թիվ 6 դպրոցի ուսումնական մասնաշենքում, որը ևս հիմնանորոգվել է «Դպրոցաշինություն» ծրագրի շրջանակներում, ամբողջությամբ իրականացվել են ներքին հարդարման, ճակատի արտաքին հարդարման, հատակների, դռների, պատուհանների, սանհանգույցների, ջեռուցման, ներքին էլեկտրամատակարարման, ջրամատակարարման, կոյուղու ներքին ցանցերի և գույքի տեղադրման աշխատանքներ:

«Լինսի» հինադրամի ֆինանսավորմամբ «Դպրոցաշինություն» ծրագրի շրջանակներում երկրորդ փուլով իրականացվել է նաև հանրակրթական երեք դպրոցների ուժեղացում-վերակառուցում Շիրակի մարզի Արևշատ, Սարակապ և Նոր Կյանք գյուղերում:

Հանրապետության ղեկավարին զեկուցվել է, որ աղետի գոտում իրականացվող բնակարանային ապահովման շինարարական ծրագրի շրջանակներում, Լոռու մարզի գյուղական բնակավայրերում 2009-2010թթ. կառուցվել և շահագործման է հանձնվել 303 բնակելի տուն:

Մինչև 10 շահառու ունեցող գյուղական բնակավայրերում 2009թ. բնակարանների գնման վկայագրերի միջոցով (ԲԳՎ) լուծվել է 6 ընտանիքի բնակապահովման խնդիր:

2011թ. կառուցվել և շահագործման է հանձնվել 153 բնակելի տուն: Լոռու մարզի քաղաքային բնակավայրերում 2009-2010թթ. կառուցվել և շահագործման է հանձնվել՝ Սպիտակում 220 բնակելի տուն, Ստեփանավանում 4 բնակելի տուն: Հերթացուցակում առկա 50 ընտանիքից 43-ն արդեն ստացել են բնակարաններ: Ստեփանավան քաղաքում բազմաբնակարան շենքերում բնակարան կորցրած շահառու ընտանիքների բնակապահովման խնդիրները լուծվել են: Վանաձորում իրացվել է 3 ԲԳՎ, Գուգարք գյուղական համայնքում բազմաբնակարան շենքում բնակարան կորցրած 15 ընտանիք ևս բնակարանային պայմանները բավարարել են ԲԳՎ-ների միջոցով:

Նոյեմբերի 1-ի դրությամբ Լոռու մարզում լուծվել է 708 ընտանիքի բնակարանային խնդիր. գյուղական բնակավայրերում՝ 477, քաղաքային բնակավայրերում՝ 231:

Ստեփանավան քաղաքում Հանրապետության ղեկավարն այցելել է պայմանագրային զինծառայող Արտակ Ղաբուզյանի ընտանիքին:

2009թ. մայիսին իբրև ժամկետային զինծառայող զորակոչված Արտակ Ղաբուզյանը (ծնվ. 08.05.1991թ.) ծառայության ընթացքում ցուցաբերել է արիություն և անձնական խիզախություն՝ մահացու վիրավորելով զորամասի մարտական դիրք ներխուժած հակառակորդին, որի համար 15.09.2010թ. ՀՀ Նախագահի հրամանագրով պարգևատրվել է «Արիության», իսկ 30.08.2010թ.՝ ԼՂՀ Նախագահի հրամանագրով «Մարտական ծառայության» մեդալներով: Զինծառայությունն ավարտելուց հետո Արտակ Ղաբուզյանը նշանակվել է ՀՀ ՊՆ Ստեփանավանի զորամասի ռեգլամենտային մարտկոցի մարտական մասի հավաքման և ռեգլամենտային աշխատանքների հաշվարկի մեխանիկ: Արտակ Ղաբուզյանը, միաժամանակ, սովորում է ԵՊՀ ռադիոֆիզիկայի ֆակուլտետի 1-ին կուրսում (հեռակա):

Այցելելով Ղաբուզյանների ընտանիքին՝ Նախագահը նախ շնորհակալություն է հայտնել Արտակի ծնողներին՝ նման օրինակելի զավակ մեծացնելու համար՝ ընդգծելով, որ պետության սահմաններն ամուր պահելու և Հայրենիքը պաշտպանելու առումով Արտակի կատարած գործն անչափ կարևոր է: Արտակի և նրա ընտանիքի անդամների հետ Սերժ Սարգսյանը զրուցել է նաև ընտանիքի առօրյա խնդիրների ու հոգսերի մասին, նշել, որ պատկան մարմիններին հանձնարարել է շատ կարճ ժամկետում լուծել նոր բնակարան հատկացնելու խնդիրը:

Լոռու մարզ կատարած աշխատանքային այցի շրջանակներում Նախագահ Սերժ Սարգսյանը Ստեփանավանի Արմանիս թաղամասում ներկա է գտնվել «Սագամար» ՓԲԸ-ի լեռնահարստացուցիչ կոմբինատի բացման արարողությանը ևս: Սերժ Սարգսյանը շրջել է կոմբինատում, ծանոթացել ընկերության ներդրումային ծրագրերի շրջանակներում իրականացված աշխատանքներին և հետագա ծրագրերին: Նախագահն այս ընկերություն էր այցելել նաև մեկ տարի առաջ, ծանոթացել իրականացված աշխատանքներին, կառուցվող կոմբինատի շինարարության ընթացքին:

Շինարարական աշխատանքներն իրականացվել են 2008-2011թթ. ընթացքում: Կառուցապատվել են հարստացուցիչ ֆաբրիկան, հանքի սպասարկման համալիրը և բաց հանքը: Կառուցապատվել է 27,263 քմ (արտադրական, սպասարկման և վարչական նշանակության շենք-շինություններ), ավտոճանապարհ` Ստեփանավան (քաղաքի կենտրոն)-Արմանիս թաղամաս-7.5կմ, ջրատար-8.8կմ, ջրհորդանիչ և ջրակարգավորիչ ավազաններ, բարձրավոլտ էլ.գիծ-3.5կմ: «Սագամար» ընկերությունում արդեն իսկ գործում է 370 աշխատատեղ: Նշվել է, որ կարճ ժամանակահատվածում այն կհասցվի մինչև 500-ի, իսկ ստորգետնյա հանքի լիարժեք շահագործման դեպքում աշխատատեղերի թիվը կդառնա 720:

Հայաստանի հանքարդյունաբերության ոլորտում իր երկու դուստր ձեռնարկությունների՝ «Սագամար» և «Մոլիբդենի աշխարհ» ընկերությունների միջոցով ներդրումային ծրագրեր իրականացնող «ՆևաՌուս» ընկերության սեփականատերերը նշել են, որ հետևողականորեն շարունակում են Հայաստանի Հանրապետության հանքարդյունաբերության ոլորտում ներդրումների իրականացման իրենց ռազմավարությունը: Նրանց հավաստմամբ, մոտ ապագայում ընկերության ջանքերն ուղղված կլինեն Դաստակերտի ու Լիճքվազ-Թեյի նախագծերի զարգացմանը, կայացմանը և հաջող գործարկմանը: Ներկա նախագծերի իրականացման շրջանակում կանխատեսվող ներդրումների ընդհանուր ծավալը կկազմի շուրջ 300 մլն ԱՄՆ դոլար, աշխատատեղերի թիվը՝ մոտ 2000:

ՀՀ նախագահի մամուլի ծառայություն
 

← Վերադառնալ ցուցակին

Բաժանորդագրում նորություններին

Տեխնիկական դիտողություններն կարող եք ուղարկել կայքի վեբ-մաստերի էլեկտրոնային փոստին: Կայքը պատրաստված է Helix ընկերության կողմից:
Վերջին թարմացումը՝ 2021-03-05 15:41:01