Պաշտոնական էլ. փոստ

(միայն www.e-citizen.am համակարգով ծանուցումների համար)

Տպել

Տեղեկատվական կենտրոն

Նորություններ

Փոխվարչապետն աշխատանքային այցով Լոռու մարզում էր

25.07.2011

 ՀՀ փոխվարչապետ, տարածքային կառավարման նախարար Արմեն Գեւորգյանն այսօր Թումանյանի քաղաքապետարանում անցկացրած խորհրդակցության ժամանակ "Հայաստանի ավտոմոբիլային ճանապարհների տնօրինություն" ՊՈԱԿ-ի տնօրեն Հենրիկ Քոչինյանի, շինարարական կապալառու կազմակերպության ղեկավարի եւ այլ պատասխանատուների հետ քննարկեց Մոտկորի ձորի ճանապարհի վերանորոգման աշխատանքների ընթացքը, որի նպատակով պետբյուջեից հատկացվել է 180,5 մլն դրամ: Ճանապարհը մարզի 6 համայնքները կապում է հիմնական մայրուղուն:

 Փոխվարչապետին ներկայացվեց իրականացվող շինարարության ծավալը, զեկուցվեց, որ աշխատանքներն ընթանում են ամբողջ ծավալով: Այստեղ ժամանակակից տեխնոլոգիաների կիրառմամբ կառուցվում է խճապատ ճանապարհ, որն արդյունավետ է շահագործման տեսանկյունից` հաշվի առնելով տարածաշրջանի բնակլիմայական պայմանները:

 Ա. Գեւորգյանն այցելեց նաեւ Թումանյանի դպրոց, որի մարզադահլիճը վերանորոգվում է մարզի առաջնահերթ խնդիրների լուծման ծրագրով: Տեղեկացվեց, որ աշխատանքների հիմնական մասն արված է, եւ վերանորոգումը կավարտվի նախատեսված ժամկետից` օգոստոսի 30-ից շուտ:

 Քարկոփ համայնքում ծանոթացավ նույն ծրագրով խմելու ջրագծի կառուցման 29 մլն 980 հազար դրամ արժողությամբ աշխատանքների ընթացքին: Համայնքի բնակիչները Ա. Գեւորգյանի հետ հանդիպմանը բարձրացրին նաեւ համայնքային ընթացիկ հարցեր, մասնավորապես` նշվեց համայնքի գազիֆիկացման անհրաժեշտության մասին:

 Այնուհետեւ փոխվարչապետը "ՀՄՀ-Հայաստան" ՊՈԱԿ-ի գլխավոր գործադիր տնօրեն Ա. Հովսեփյանի ուղեկցությամբ Օձուն, Ճոճկան համայնքներում ծանոթացավ "Հազարամյակի մարտահրավեր-հիմնադրամ Հայաստան" ծրագրով վերանորոգվող ոռոգման ներտնտեսային ցանցերի շինարարական աշխատանքների ընթացքին: Դրանք կավարտվեն նախատեսված ժամկետներում` մինչեւ օգոստոսի 31-ը:

 Տեղեկացվեց, որ Օձուն-Այգեհատ ջրագծերի վերականգնման արդյունքում Օձուն համայնքում էականորեն նվազել են ջրի կորուստները, ընթացիկ տարում արդեն լրացուցիչ մշակվել է 90 հա հողատարածք: Ճոճկանում մինչեւ ծրագրի մեկնարկը մշակվում էր 250 հա հողատարածք, ներկայումս ոռոգելի հողատարածքները կազմում են 450 հա, իսկ ծրագրի ավարտին եւս 300 հա կդառնա ոռոգելի: Վերակառուցված ոռոգման ցանցը հնարավորություն կստեղծի մշակել ավելի բարձր եկամտաբերություն ունեցող մշակաբույսեր, ներկայիս մշակվող բույսերը կարող են փոխարինվել նոր պտղատու այգիներով:

 Ա. Գեւորգյանն աշխատանքային այցի ավարտին եղավ նաեւ ՀՄՀ-ով վերականգնվող Նոյեմբերյանի պոմպակայանում, ծանոթացավ կատարված աշխատանքների ծավալին: Զեկուցվեց, որ պոմպերի վերազինման եւ պոմպակայանի վերակառուցման աշխատանքներն արդեն ավարտված են, պոմպերն արդեն շահագործվում են: Ավարտված է պատվարի վերակառուցման աշխատանքների հիմնական մասը: Հաշվի առնելով շինարարության բարդ տեխնիկական լուծումները եւ շինարարության ընթացքում դրանց ապահովման դժվարությունները` պատվարի շինարարութան ամբողջական ավարտը նախատեսվում է մինչեւ օգոստոսի 20-ը:

 ՀՄՀ-ի պատասխանատուները փոխվարչապետին ներկայացրին նաեւ ՀՄՀ ծրագրով Տավուշի մարզում իրականացվող աշխատանքների ընթացքը: Տեղեկացվեց, որ մարզում աշխատանքներն ընթանում են ողջ թափով եւ կավարտվեն նախատեսված ժամկետներում:

 Փոխվարչապետը կարեւորեց աշխատանքները որակով եւ առանց թերությունների իրականացնելու հանգամանքը, ինչպես նաեւ շահագործման ժամանակ ընթացիկ խնդիրներին արագ արձագանքելու անհրաժեշտությունը:

 

ՀՀ ՏԿՆ հասարակայնության հետ կապերի բաժին

← Վերադառնալ ցուցակին

Բաժանորդագրում նորություններին

Տեխնիկական դիտողություններն կարող եք ուղարկել կայքի վեբ-մաստերի էլեկտրոնային փոստին: Կայքը պատրաստված է Helix ընկերության կողմից:
Վերջին թարմացումը՝ 2024-03-28 16:44:14