Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Ուղերձներ, շնորհավորանքներ
Լոռու մարզպետ Արամ Ղազարյանի շնորհավորական ուղերձը Մամուլի ազատության համաշխարհային օրվա առթիվ
02.05.2025
Զանգվածային լրատվության միջոցների հարգարժա՛ն ներկայացուցիչներ,
սրտանց շնորհավորում եմ ձեզ Մամուլի ազատության համաշխարհային օրվա կապակցությամբ:
Ժողովրդավարական գաղափարներով և սկզբունքներով առաջնորդվող մեր երկրում զանգվածային լրատվամիջոցների ազատ և անկաշկանդ գործունեությունն առաջնային կարևորություն ունի, քանզի խոսքի և մամուլի ազատության դրույթն ամրագրված է ՀՀ Սահմանադրությամբ և օրենքներով:
Հայաստանի Հանրապետությունը աներկբա կերպով կանգնած է անկախ մամուլի պաշտպանության դիրքերում:
Օգտվելով առիթից՝ իմ երախտագիտությունն եմ հայտնում բոլոր այն լրատվամիջոցներին և լրագրողներին, ովքեր հավատարիմ են իրենց կոչմանը, իրենց գործունեությունն իրականացնում են օրենսդրությանը և էթիկայի նորմերին համապատասխան: Լրագրողի առաքելությունն է տեղեկատվությունը օպերատիվ և մատչելի կերպով հասցնել հասարակությանը և մասնագիտական հմտությունները ծառայեցնել բարի, արդար նպատակների՝ զերծ մնալով ապատեղեկատվության տարածումից: Այսօր՝ առավել քան երբևէ՝ տեղեկատվական տեխնոլոգիաների սրընթաց զարգացման դարաշրջանում, ապատեղեկատվության դեմ պայքարը առաջնային կարևորություն ունի, և այս հարցում մեծ է նաև ձեր դերակատարությունը՝ հանրությանը ճշմարիտ, բազմակողմանիորեն ստուգված տեղեկատվության մատուցման նպատակամղմամբ:
Լոռու մարզպետի աշխատակազմը՝ որպես տարածքային կառավարում իրականացնող մարմին, երաշխավորում է լրատվամիջոցների անխափան գործունեությունը, տեղեկատվության հասանելիությունը, հասարակության ու լրատվամիջոցների՝ տեղեկատվություն ստանալու իրավունքը:
Կրկին շնորհավորելով Մամուլի ազատության համաշխարհային օրվա կապակցությամբ՝ մաղթում եմ ձեզ ընտանեկան բարեկեցություն, ստեղծագործական նորանոր հաջողություններ:
