Լոռու մարզպետի աշխատակազմ

Հայաստանի Հանրապետության հարգելի՛ քաղաքացիներ, սիրելի՛ լոռեցիներ,
ջերմորեն շնորհավորում եմ ձեզ Քաղաքացու օրվա կապակցությամբ։ Քաղաքացին յուրաքանչյուր պետության հիմնասյունն է:
Հայաստանի Հանրապետության քաղաքացի լինելը պատիվ է և միաժամանակ՝ մեծ պատասխանատվություն:
Քաղաքացու օրը ոչ միայն օրացուցային տոն է, այլև ունի խորհրդանշական մեծ կարևորություն: Այն սերտորեն կապված է ժողովրդավարության գաղափարի հետ: Ժողովրդավարությունը ենթադրում է խոսքի, արտահայտվելու ազատություն, տեղաշարժի ազատություն և մի շարք այլ ազատություններ ու դրանք լիարժեքորեն տրված են մեր հասարակությանը:
Սիրելի՛ հայրենակիցներ,
այս օրը ևս մեկ հնարավորություն է արժևորելու մեր երկրի քաղաքացուն՝ արժանապատվությամբ կրելու ՀՀ քաղաքացու կոչումը՝ հանուն մեր պետության բարօրության։
Մեզնից յուրաքանչյուրը պետք է լինի Հայաստանի Հանրապետության հենարանն ու պահապանը՝ ամուր կանգնելով նրա ապագայի համար և ամենօրյա բարեխիղճ գործունեությամբ նպաստի սիրելի հայրենիքի զարգացմանը և վերելքին։ Միայն քաղաքացու գիտակցված մասնակցությամբ, անձնուրաց աշխատանքով է ձևավորվում հզոր հասարակություն և ամրապնդվում պետությունը:
Լոռին հարուստ է տաղանդավոր և աշխատասեր քաղաքացիներով, ովքեր իրենց բարձր քաղաքացիական գիտակցությամբ, նախաձեռնություններով և ակտիվ մասնակցությամբ յուրաքանչյուր օր իրենց համեստ ներդրումն են ունենում մեր երկրի, մարզի, համայնքների զարգացման գործում։
Կրկին շնորհավորելով այս նշանակալի տոնի կապակցությամբ՝ մաղթում եմ ձեզ խաղաղություն, առողջություն և բարեկեցություն։ Թող յուրաքանչյուր բնակչի պատասխանատու ու գիտակից մոտեցումը դառնա ՀՀ քաղաքացու առաջընթացի ճանապարհը։
Շնորհավո՛ր տոնդ, Հայաստանի Հանրապետության քաղաքացի: