Լոռու մարզպետի աշխատակազմ

ՆԳՆ Փրկարար ծառայության հարգելի՛ աշխատակիցներ, վետերաննե՛ր, ջերմորեն շնորհավորում եմ ձեզ մասնագիտական տոնի՝ Փրկարարի օրվա առթիվ:

Օգտվելով առիթից՝ իմ խորին երախտագիտությունն եմ հայտնում ձեզ՝ անձնվեր ու անշահախնդիր աշխատանքի, նվիրումի համար:

Փրկարար լինելն առաքելություն է, կոչում և քչերին է միայն վիճակված կրելու փրկարար լինելու բարձր պատիվը: Մեր փրկարարները մեկ անգամ չէ, որ ապացուցել են դա՝ անձնուրաց աշխատանքով, հաճախ առողջության ու կյանքի գնով փրկելով հազարավոր կյանքեր: Ասվածի վառ ապացույցն է ձեր՝ մեծագույն երախտագիտության արժանի աջակցությունը ամիսներ առաջ մարզին պատուհասած աղետի հետևանքների վերացման, աղետից տուժած բնակիչներին աջակցության ցուցաբերման գործում:

Դուք մեր բնակչության կողքին էիք աղետի առաջին իսկ րոպեներից մինչև վերջ, երբ հնարավոր եղավ արդեն ապահովել հաղորդակցությունը բնակավայրերի միջև: Մոռանալով սեփական անձը, անտեսելով հոգնածությունը՝ դուք չէիք դադարում օգնել աջակցության կարիք ունեցողներին՝ միաժամանակ ցուցաբերելով մեծագույն հոգեբանական աջակցություն:

Խոնարհումս ձեր մարդկային բարձր որակների ու մասնագիտական պրոֆեսիոնալիզմի առջև:

Փրկարար ծառայության հարգելի՛ աշխատակիցներ, այսօր արդեն վստահաբար կարող ենք ասել, որ երկար տարիների քրտնաջան աշխատանքի, մասնագիտական կարողությունների հետևողական զարգացման, պետության և միջազգային կառույցների մեծագույն աջակցությամբ ոլորտը լիարժեք կայացած է մեր երկրում ու շարունակական զարգացում է ապահովում: Մեր հանրությունն այսօր մեծ վստահություն ունի ձեր նկատմամբ, իսկ դա ձեր աշխատանքի ամենամեծ գնահատականն է:

Ջերմորեն շնորհավորում եմ նաև վետերաննե՛րին: Ձեր փորձառությունը, գործին նվիրվածությունը, որպես օրինակ է ծառայել ավելի երիտասարդ աշխատակիցների համար՝ դառնալով այն հիմնասյունը, որի վրա նրանք կառուցում են արդեն սեփական փորձառությունը:

Կրկին շնորհավորելով Փրկարարի օրվա առթիվ՝ մաղթում եմ ձեզ անվտանգ ծառայություն, բարեկեցություն և բարօրություն ձեր ընտանիքներին: