Լոռու մարզպետի աշխատակազմ

Թանգարանների հարգելի՛ աշխատակիցներ, արվեստաբաննե՛ր ու պատմաբաննե՛ր, հնագետնե՛ր ու ազգագրագետնե՛ր,
ջերմորեն շնորհավորում եմ ձեզ Թանգարանների միջազգային օրվա առթիվ:
Թանգարանները յուրօրինակ կամուրջ են ժամանակների և մշակույթների միջև, նրանցում ոչ միայն արժեքներ են պահպանվում, այլև կատարվում է գիտական լուրջ աշխատանք, և այդ ամենը ձե՛ր շնորհիվ, թանգարանային գործի հարգելի՛ նվիրյալներ:
Թանգարանները հայրենագիտության ու արվեստի ինքնատիպ կրթամշակութային օջախներ են, որտեղ համադրված են պատմությունն ու հիշողությունը, արվեստն ու արհեստը: Այս օրվա խորհուրդն ու ուղերձը նաև թանգարանների դերի վերարժևորումն է. այն, որ բացի արժեքավոր արվեստի նմուշներ ցուցադրելուց, նրանք նաև բացահայտում են տվյալ երկրի ինքնությունը, մշակութային առանձնահատկությունները և ակամա կամուրջ դառնում սերունդների միջև:
Լոռու մարզը ևս հարուստ է թանգարաններով՝ Լոռի-Փամբակի, Գուգարքի հարուստ պատմամշակութային ժառանգությունը ներկայացնող երկրագիտական, հնագիտական, ազգագրական, կերպարվեստի, ինչպես նաև հայտնի գրողների ու գործիչների տուն-թանգարաններով, որտեղ պահվում են սրբագույն մասունքներ, նմուշներ:
Թանգարանային նմուշներ են նաև մեր հնադարյան վանքերը, եկեղեցիները, կամուրջներն ու բերդերը, որոնցով չափազանց հարուստ է նաև մեր մարզը: Դրանք մեր դարավոր պատմության, մեր հինավուրց քաղաքակրթության վկայություններն են: Մեր երկիրը թանգարան է բաց երկնքի տակ:
Կրկին շնորհավորում եմ ոլորտի բոլոր մասնագետներին, որոնք իրենց նվիրյալ և բարեխիղճ աշխատանքով նպաստում են մեր հարուստ մշակութային ժառանգության պահպանությանը և հանրահռչակմանը, թանգարանների կայուն զարգացմանը: Ոլորտի նվիրյալներին մաղթում եմ ստեղծագործական անսպառ եռանդ և մասնագիտական նորանոր ձեռքբերումներ: