Լոռու մարզպետի աշխատակազմ

Սիրելի՛ հայրենակիցներ, լոռեցինե՛ր,
Երեսուներկու տարի առաջ՝ այս օրը, իրականություն դարձավ մեր ժողովրդի բաղձալի երազանքը՝ մեր երկիրը հռչակվեց անկախ հանրապետություն: Բայց այդ երազանքը մեզ հենց այնպես չտրվեց, այն ողողված է արյունով, կորուստներով, արցունքներով, ուստի այն առավել քան թանկ է մեզ համար:
Ցավոք, այս տոնական օրը տխրությամբ ու տագնապով է լցված, քանզի Լեռնային Ղարաբաղի մեր հայրենակիցները կենաց ու մահու կռիվ են տալիս՝ հանուն լինելիության, հանուն իրենց բնօրրանում ապրելու իրավունքի:
Ինչպես վկայում է մեր՝ ավելի քան երեք հազարամյա պատմությունը, ճակատագրով վիճակված է, որ մենք մեր պապերի կառուցած երկրում պետք է ապրենք՝ անընդհատ պայքարելով, քանզի, առանց Հայրենիքի, մենք զուրկ կլինենք ինքնությունից, չենք ունենա անցյալ ու առավել ևս՝ ապագա: Իսկ դրա համար, հատկապես այս օրհասական օրերին, պետք է լինենք միասնական և համախմբված: Պատմության քառուղիներում մենք ունեցել ենք և՛ փառապանծ հաղթանակներ, և՛ ցավոք՝ պարտություններ: Հաղթանակներ տոնել ենք այն ժամանակ, երբ մեկ բռունցք ենք դարձել ու համախմբվել: Մեր պարտությունները եղել են միայն ու միայն ոչ միասնականության, պառակտման ու դավաճանության արդյունքում: Պետք է վերջապես դասեր քաղել անցյալից: Կհարատևենք, եթե միասնական լինենք:
Հայաստանի Հանրապետության Անկախության օրվա առթիվ կրկին ուզում եմ խոնարհումս հայտնել մեր հերոս տղաներին, հավերժ փա՛ռք ձեզ, և ուժ, հաղթական բազուկ ու անկոտրում կամք՝ սահմանին կանգնած մեր քաջերին:
Աստված պահապան:

ԱՐԱՄ ԽԱՉԱՏՐՅԱՆ
ԼՈՌՈՒ ՄԱՐԶՊԵՏ