Լոռու մարզպետի աշխատակազմ

Սիրելի՛ լոռեցիներ,
այսօր մեր փառապանծ Հայոց բանակի օրն է, ինչի կապակցությամբ շնորհավորում եմ բոլորիս, քանզի բանակն է մեր պետության ու պետականության երաշխավորը, մեր ուժն ու հպարտությունը:
Այս օրը հավասարապես բոլորինս է՝ սահմանին կանգնած զինվորինը, սպայինն ու գեներալինը, մեր քաջարի զինվորների ծնողներինն ու հարազատներինը և յուրաքանչյուր այն հայինը, ով իր աղոթքներում Աստծուց խաղաղություն և առողջություն է խնդրում հայ զինվորի համար:
Հայոց հզո՛ր բանակ,
մեր անկախության ու անվտանգության երաշխավոր,
շնորհավո՛ր տարեդարձդ:
Հանուն հայրենիքի պաշտպանության մեր բազմաթիվ զինվորների, սպաների, գեներալների, կամավորների անօրինակ սխրանքների, հերոսությունների շնորհիվ կարողանում ենք հաղթահարել մեզ բաժին հասած ծանր փորձությունները:
Այսօր էլ պետք է կարողանանք նայել գալիքին լավատեսորեն և յուրաքանչյուրս մեր տեղում, մեր հնարավորությունների չափով անել ամեն ինչ մեր երկիրն ավելի լավը դարձնելու, մեր բանակն ավելի բարձր մակարդակի հասցնելու համար:
Մի բան ակնհայտ է ու անվիճելի, որ հայ ժողովրդի անվտանգությունն ինչպես նախկինում՝ այսօր էլ, շարունակում է մնալ բացարձակ առաջնահերթություն, և այդ անվտանգության ապահովման թիվ մեկ երաշխավորը Հայոց բանակն է, մեր քաջարի մարտիկները:
Ուզում եմ Հայոց բանակի օրվա առիթով կրկին ու կրկին շնորհավորել զինվորական գործի բոլոր նվիրյալներին, ում գործունեությունը դրվել է Հայոց բանակի ձևավորման հիմքում, շնորհակալություն հայտնել անձնվեր ծառայության համար:
Օգտվելով առիթից՝ ցանկանում եմ նաև շնորհակալություն հայտնել մեր բոլոր զինծառայողների ընտանիքներին համբերության, տոկունության համար:
Այս տոնական օրը, պարտավոր ենք հիշել ու մեր խորին խոնարհումը հայտնել նաև հանուն հայրենքի նահատակված մեր հերոսների հիշատակին:
Հավերժ փա՛ռք ձեզ:
Փա՛ռք ՀԱՅ ԶԻՆՎՈՐՆԵՐԻՆ:
Փա՛ռք ՀԱՅՈՑ ԲԱՆԱԿԻՆ:
Փա՛ռք մեր նահատակներին:
Փա՛ռք առյուծներ ծնող մայրերին:
Շնորհավո՛ր ՀԱՅՈՑ ԲԱՆԱԿԻ օրը: