Լոռու մարզպետի աշխատակազմ

Հայոց հզո՛ր բանակ,
Հայոց բանակի քաջարի՛ մարտիկներ,
Հայ զինվորնե՛ր, սպանե՛ր, գեներալնե՛ր,
Շնորհավո՛ր Հայոց բանակի օրը, երիցս փա՛ռք ձեզ,
Խորին խոնարհումս ձեզ:
Ցավոք, կրկին դժբախտություն ունեցանք առնչվելու մեր ազգին դարեր շարունակ հետապնդող ծանր ճակատագրի հեգնանքին, բայց ընկճվելու, թևաթափալ լինելու իրավունք պարզապես չունենք: Եկել ենք դարերի խորքից ու ճակատներս բաց` շարժվելու ենք դեպի պայծառ գալիք, ու թող ոչ ոք դրանում կասկած չունենա:
Հաղթահարելու ենք նաև այս դժվարին օրերը ու մեր հաղթական դրոշը նորից ենք ծածանելու հայոց կապույտ երկնակամարում, բա՛րձր, շա՛տ բարձր: Ընկճվելու իրավունք չունենք, քանզի ունենք ձեզ նման քաջարի զավակներ:
Մարտի դաշտից պատմվող հերոսությունները լեգենդների են նմանվում, բայց դրանք լեգենդներ չեն, դրանք իրական սխրաքներ են, որոնք ազնավազարմ քաջերի մենաշնորհն են միայն:
Կրկին խորին խոնարհուս ձեզ: Հայոց բանակն անպարտ է այնքան ժամանակ, քանի դեռ ամուր է հայ զինվորի կամքը, քանի դեռ մեր երիտասարդների երակներում Հայկի, Տիգրանի, Վարդան ու Վասակ Մամիկոնյանների արյունն է հոսում:
Քաջարի արծիվներ ծնող մայրե՛ր,
Այդ ինչ ոգով եք սնել, դաստիարակել ձեր զավակներին, որ վայրկյան անգամ չվարանելով՝ սեփական կյանքն ընծա բերեցին հանուն հայրենիքի և զինակից ընկերների:
Այսպիսի ազգը դատապարտված է հավիտյանս ապրելու և արարելու իր պապերի բնօրրանում:

Փա՛ռք ռազմի դաշտում նահատակված մեր հերոսներին:
Դուք չեք խնայել ձեր կյանքը հանուն ավելի վեհ գաղափարի՝ հանուն հայրենիքի ու այս մի բուռ հողում մեր բոլորի ազատ ապրելու իրավունքի:
Շնորհակալ ենք ձեզ, տղե՛րք: Ձեր սխրանքն անմահ է, ձեր անունները հավերժ լինելու են մեր շուրթերին, մեր սրտերում ու հոգիներում:
Սերունդները կրթվելու ու դաստիարակվելու են ձեր սխրանքների մասին լսելով, կարդալով, և այդ պատմությունները, դարեր թևածելով, հասնելու են ապագա, իսկ այնտեղ՝ ապագայում, հայը լինելու է հզոր, երկու ոտքով ամուր կանգնած իր պապերի հողին, անպարտ և միասնական:
Փա՛ռք հայ զինվորներին:
Փա՛ռք Հայոց բանակին:
Փա՛ռք մեր նահատակներին:
Փա՛ռք առյուծներ ծնող մայրերին:
Շնորհավո՛ր Հայոց բանակի օրը:

ԱՐԱՄ ԽԱՉԱՏՐՅԱՆ
ԼՈՌՈՒ ՄԱՐԶՊԵՏ