Տեղեկատվական կենտրոն
Ուղերձներ, շնորհավորանքներ
Վեհ առաքելություն՝ մայրություն
04.04.2014
Հարգելի մայրեր, սիրելի կանայք, քույրեր:
Ջերմորեն շնորհավորում եմ ձեզ Մայրության ու գեղեցկության տոնի կապակցությամբ:
Այս հիասքանչ տոնը ևս մեկ առիթ է խոսելու Ձեր նկատմամբ ունեցած մեր անսահման սիրո ու նվիրվածության մասին, կարևորելու Ձեր բացառիկ կենսատու դերը: Պատահական չէ, որ տոնը քրիստոնեական արմատներ ունի՝ Սուրբ Աստվածածնի Ավետման խորհրդով:
Կնոջն ի վերուստ տրված ամենավեհ առաքելությունը մայրությունն է: Մայրը սրբազնագույն է յուրաքանչյուրիս համար: Ուստի, տոնական այս բացառիկ օրվա շնորհավորանքներին այսօր պետք է գումարենք նաև մեր անսահման երախտագիտությունը հայ մայրերի ու կանանց հանդեպ, փաստենք, որ Ձեր հավատարմության ու խոհեմության շնորհիվ միշտ եղել եք ազգապահպանության և մեր ժողովրդի բազում հաղթանակների ակունքը:
Սիրելի մայրեր,
Կրկին շնորհավորելով ձեզ Մայրության և գեղեցկության տոնի առթիվ` մաղթում եմ ընտանեկան ջերմություն, զավակների կողմից սիրված և գնահատված լինելու երջանկություն:
ԱՐԹՈՒՐ ՆԱԼԲԱՆԴՅԱՆ
ԼՈՌՈՒ ՄԱՐԶՊԵՏ