Լոռու մարզպետի աշխատակազմ

 Վանաձորի Էդ. Կզարթումյանի անվան երաժշտական դպրոցի դահլիճում անցկացվեց խորհրդակցություն մարզի համայնքների ղեկավարների մասնակցությամբ, որը վարում էր Լոռու մարզպետ Անդրեյ Ղուկասյանը: Խորհրդակցությանը ներկա էր ՀՀ տարածքային կառավարման և ենթակառուցվածքների նախարար Սուրեն Պապիկյանը:
Վերջինս իր ելույթում կարևորեց համայնքների ղեկավարների մասնակցությամբ խորհրդակցություններին նախարարության պաշտոնյաների մասնակցությունը, որպեսզի հնարավոր լինի համայնքների ղեկավարների կողմից բարձրացված խնդիրներն անմիջապես գույքագրել և տեղում լուծումներ առաջարկել, պատասխանել բարձրացված հարցերին:
Նա իր խոսքում անդրադարձավ համայնքների կողմից իրականացվող սուբվենցիոն ծրագրերին՝ ողջունելով այն համայնքներին, որոնք միաժամանակ մի քանի ծրագրեր են առաջարկել՝ այդ կերպ փորձելով լուծել համայնքներում առաջնային լուծում պահանջող խնդիրները և մտահոգություն հայտնելով այն համայնքների առնչությամբ, որոնք լուսանցքից դուրս են մնացել և մասնակից չեն դարձել զարգացման գործընթացներին:
-Հնարավորություն հավասարապես տրվել է բոլոր համայնքներին, սակայն դրանից օգտվել են ոչ բոլորը: Պատճառները տարբեր են. ոմանք կամ չեն կարողացել կամ չեն ցանկացել նպաստել իրենց գյուղերի կամ քաղաքների զարգացմանը: Երկու դեպքում էլ ոչ ցանկալի իրավիճակ է ստեղծվել,- ասաց նախարարը՝ շեշտելով, որ նման համայնքների ղեկավարները պետք է մտածեն՝ իրենց պաշտոնավարմամբ նպաստում, թե վնասում են համայնքների զարգացմանը:
-Բոլորիդ աշխատանքը և անգործությունը խիստ տեսանելի է: Եթե այսօր աչք փակենք անգործության վրա, ապագայում կունենանք այն, ինչ ունեցել ենք տարիներ շարունակ: Համայնքապետը պատասխանատու է իր համայնքի զարգացման համար, յուրաքանչյուրդ պետք է պատկերացնեք՝ ինչպե՞ս եք տեսնում ձեր քաղաքի կամ գյուղի ապագան,-ասաց նախարարը:
Նա հայտարարեց, որ կառավարությունը պատրաստ է ֆինանսավորելու այն ռեալ, իրատեսական, հեռանկարային ծրագրերը, որոնք կներկայացվեն համայնքների կողմից: Լուրջ շեշտադրում է արվելու Վանաձորի՝ զբոսաշրջային քաղաք լինելու երբեմնի համբավը վերականգնելու ուղղությամբ:
Նա խիստ դիտարկումներ արեց նաև հարկերի ցածր հավաքագրումներ ունեցող համայնքների նկատմամբ:
Մարզի համայնքներում իրականացվող սուբվենցիոն ծրագրերի ընթացքի մասին զեկուցեց մարզպետարանի քաղաքաշինության վարչության պետ Արմեն Ջանազյանը: Նրա տեղեկացմամբ, այս տարի ՀՀ կառավարության կողմից Լոռու մարզում հաստատվել է 56 ծրագիր: 2019թ. համար սուբվենցիոն ծրագրերի իրականացման նպատակով պետբյուջեի ներդրումը կազմել է շուրջ 887 մլն դրամ, համայնքային ներդրումը՝ 803.9 մլն դրամ:
Ծրագրերի իրականացման աշխարհագրությունը ևս ընդլայնվել է. 26 համայնքում՝ 56 ծրագիր(նախորդ տարի՝ 14 համայնքում՝ 20 ծրագիր)։ Ծրագրերն իրականացվել են 9 տարբեր ուղղություններով։

Այս պահի դրությամբ ավարտված է 16 ծրագիր, ընթացքի մեջ են 37-ը և գնման գործընթաց իրականացվում է 3 -ի համար: Ա. Ջանազյանը նշեց, որ Լոռու մարզպետի հանձնարարությամբ վարչության աշխատակիցները պարբերական վերահսկողություն են իրականացնում շինհրապարակներում՝ արձանագրելով թերությունները, ներկայացնելով մարզի ղեկավարի ուշադրությանը և վերջինիս հանձնարարությամբ՝ առաջարկում վերացնել դրանք:
Ա. Ջանազյանը մասնավորապես անդրադարձավ արձանագրված խնդիրներին: Նա նշեց, որ հիմնական ամենալուրջ խնդիրը ժամկետներից ուշացումների հետ է կապված, որոնց պատճառներն, ըստ իրականացված վերլուծության, հետևյալն են՝ մարզում իրականացվում են աննախադեպ լայնածավալ շինաշխատանքներ, մեկ շինկազմակերպություն, միանգամից մի քանի մրցույթներում հաղթող ճանաչվելով, մարդկային և տեխնիկական փոքրածավալ ռեսուրսներով չի կարողանում տեղավորվել ժամկետներում, հետևաբար աշխատանքները դանդաղում են, և երրորդ՝ նախագծանախահաշվային աշխատանքներում հընթացս հայտնաբերվել են թերություններ և շտկման անհրաժեշտություն է առաջացել, ինչի հետևանքով աշխատանքները դարձյալ դանդաղել են: Այդուհանդերձ, ըստ վարչության պետի, կլինեն աշխատանքներ, որոնք ժամկետներում չտեղավորվելու պատճառով կտեղափոխվեն հաջորդ տարի:
Սուրեն Պապիկյանն, անդրադառնալով խնդրին, առաջարկեց իրավական համապատասխան մեխանիզմներ կիրառել նման շինկազմակերպությունների նկատմամբ, որպեսզի արդեն հաջորդ տարիներին նման խնդիրներ չառաջանան:
Մարզպետ Անդրեյ Ղուկասյանն իր հերթին առառանձին-առանձին անդրադարձավ այն համայնքների խնդիրներին, որտեղ ժամկետների ուշացումներ են արձանագրվել: Համայնքների ղեկավարները վստահեցրեցին, որ աշխատանքները, թեև ժամկետների ուշացումներով, բայց հիմնականում հնարավոր կլինի ավարտել մինչև տարեվերջ: Մարզի համայնքների բյուջեների սեփական եկամուտների կատարման ցուցանիշները ներկայացրեց Ֆինանսական և սոցիալ- տնտեսական զարգացման վարչության պետ Հրայր Պապոյանը:Նրա տեղեկացմամբ՝ 2019 թվականի հոկտեմբերի 1-ի դրությամբ համայնքային բյուջեների եկամուտների հավաքագրման ցուցանիշները նախորդ տարվա նույն ժամանակահատվածի համեմատությամբ ապահովվել է 108.4 տոկոսով: Մարզի համայնքների բյուջեներով 2019թ. տարեկան պլանի կտրվածքով նախատեսված եկամուտների հավաքագրումը ապահովվել է 63.9 տոկոսով, 9 ամսվա պլանի նկատմամբ՝ 84.6 տոկոսով: Կամ նախատեսված 8352.0 մլն. դրամ տարեկան պլանի և 9 ամսվա 6305.2 մլն. դրամ պլանի դիմաց հավաքագրվել է 5336.5 մլն. դրամ: Հոկտեմբերի 23-ի դրությամբ եկամուտների հավաքագրումը կազմել է 65.3 տոկոս:
Նա անդրադարձավ հիմնականում թերացող համայնքներին՝ նշելով, որ սեփական եկամուտների գծով մինչև 50 տոկոս հավաքագրում են ապահովել՝ Հալավար(41 տոկոս), Շնող(41.6), Ջրաշեն(42.9), Վահագնի(43.4), Սարամեջ(45.4), Գոգարան(46), Մեծ Պարնի(47.1), Ձորագյուղ(47.9): Խոշորացված համայնքներից թերացողների թվում է նաև Սարչապետը: Համայնքների ղեկավարների կողմից ներկայացվեցին մի շարք պատճառաբանություններ, որոնց թվում՝ բնակիչների բացակայությունը համայնքներից, ժառանգությունների խնդիրները, բազաների անճշտությունները և այլն:
Մարզի ղեկավարն, անընդունելի համարելով ցանկացած պատճառաբանություն, նշեց, որ իր խորին համոզմամբ, սեփական եկամուտների հավաքագրման ցուցանիշը շատ դեպքերում ուղիղ համեմատական է համայնքների ղեկավարների լեգիտիմությանը:
«Երկրաշարժի հետևանքով բնակարան կորցրած ընտանիքների բնակապահովման ծրագրի» ընթացքին անդրադարձավ Լոռու մարզպետի խորհրդական Լևոն Ասլանյանը: Նա նշեց, որ «Ֆուլլեր» տնաշինական կենտրոնի հետ համագործակցությամբ այն շատ ինտեսիվ և արդյունավետ ընթացք է ստացել: Լ. Ասլանյանը ներկայացրեց նաև մարզային իշխանությունների դիրքորոշումը հաջորդ տարվա համար ծրագիրը վերջնական ավարտին հասցնելու նպատակով պետբյուջեից հատկացվելիք միջոցների վերաբերյալ՝ առաջարկելով խնդիրը լուծել բնակարանաշինության տարբերակով:
Ամփոփելով խորհրդակցությունը՝ մարզի ղեկավարը շնորհակալություն հայտնեց նախարարին ներկա գտնվելու և բարձրացված խնդիրների վերաբերյալ պարզաբանումներ տալու համար:
Ա. Ղուկասյանը նաև իր մի շարք նկատառումները հայտնեց քննարկված հարցերի վերաբերյալ՝ առաջարկելով համայնքներին այսօրվանից սկսած նախապատրաստել 2020թ.-ին իրականացվելիք սուբվենցիոն ծրագրերի փաթեթները: