Լոռու մարզպետի աշխատակազմ

 Մարզպետ Անդրեյ Ղուկասյանը և մարզպետարանի համապատասխան ստորաբաժանումները Վանաձորի մի խումբ բնակիչների կողմից դժգոհություններ էին ստանում՝ Վանաձորում իրականացվող փողոցների բարեկարգման աշխատանքները անորակ իրականացնելու վերաբերյալ: Մարզպետ Ղուկասյանի հանձնարարությամբ մարզպետարանի քաղաքաշինության վարչությունը ուսումնասիրութուններ է իրականացրել Վանաձորի բարեկարգվող փողոցներում՝ փաստելով, որ անգամ անզեն աչքով որոշ փողոցներում կարելի է դիտարկել անորակ կամ տեխնիկական թերություններով կատարված աշխատանք: Հարկ է նշել, որ պետական աջակցությամբ իրականացվող սուբվենցիոն ծրագրերի շրջանակներում Վանաձորում առաջին փուլով բարեկարգման աշխատանքներ են իրականացվում՝ Լազյան, Շիրակացի. Չերկասի, Մաշտոցի, Սասունցիների, ինչպես նաև Շինարարների, Իսահակյան, Ներսիսյան փողոցների միացման հատվածում, Մալաթիայի, Վերածննդի փողոցներում:
Խնդրի քննարկման և պատճառների վերհանման նպատակով մարզի ղեկավարի հարվերով խորհրդակցություն անցկացվեց Վանաձորի քաղաքապետ Մամիկոն Ասլանյանի, քաղաքապետարանի և մարզպետարանի պատասխանատու պաշտոնյաների և «Ֆուլտրաստ» ՍՊԸ գլխավոր ինժեներ Արման Խալաթյանի մասնակցությամբ:
Քաղաքապետը պարզաբանեց, որ շինաշխատանքների մրցույթը հայտարարվել է օրենքով սահմանված կարգով և ժամկետներում: Մրցույթում սահմանված արժեքի շուրջ 64 տոկոսի չափով գին առաջարկելով՝ հաղթող է ճանաչվել «Ֆուլտրաստ» ընկերությունը: Քաղաքապետը վստահեցրեց, որ բազմիցս զգուշացրել են շինկազմակերպությանը շինաշխատանքների անորակության վերաբերյալ: Նշվեց, որ անորակ ասֆալտ է օգտագործվել Լազյան և Շիրակացի փողոցներում, մյուս փողոցներում տեխնիկական թերություններ են: Շինարարական կազմակերպության ներկայացուցիչը պարզաբանեց, որ ասֆալտի անորակությունը պարզվել է այն տեղադրելուց հետո միայն: Անորակությունն ի հայտ է եկել խտացումից հետո: Մարզպետը խստորեն պահանջեց թերությունները վերացնել տասնօրյա ժամկետում, այլապես աշխատանքները չեն ընդունվի:
-Մեր մարզում այլևս որևէ անորակ շինաշխատանք չի կատարվելու,-ասաց Ա. Ղուկասյանը: