Լոռու մարզպետի աշխատակազմ

 «Լույս» հիմնադրամը, համագործակցելով Վանաձորի տեխնոլոգիական կենտրոնի, «Ձեռնարկությունների Ինկուբատոր» հիմնադրամի հետ, Հայաստանում հյուրընկալում է «ՄՏԻ (MIT) գիտության և տեխնոլոգիայի միջազգային նախաձեռնություններ» ծրագիրը` կապեր հաստատելով աշխարհի գերազանցության կենտրոնների և Հայաստանի կրթական առաջատար հաստատությունների միջև: Հայաստանում արդեն երրորդ անգամ իրականացվեց «Գլոբալ ուսումնական լաբորատորիաներ» (Global Teaching Labs) ձևաչափով դասընթացը: «Գլոբալ ուսումնական լաբորատորիան» ուսուցման և դասավանդման նոր եղանակ է, որը ոգեշնչել է աշակերտների և ուսուցիչների ամբողջ աշխարհից:
Դասընթացն անցկացվեց հուլիսի 10-ից 19-ը Վանաձորի տեխնոլոգիական կենտրոնում, որը համալրված է ուսումնական այս գործընթացի համար անհրաժեշտ լաբորատորիաներով: Վանաձորի դպրոցներից դասընթացին մասնակցեց շուրջ 40 դպրոցական:
Ուսուցման այս նոր ձևը ներկայացնում է «շրջած դասասենյակի» կոնցեպտը: Այս մոտեցումը սովորողներին թույլ է տալիս օգտվել ՄՏԻ-ի (MIT) ուսումնական նյութերի առցանց հարուստ բազայից, որտեղից ստացած գիտելիքը նրանք կիրառում են գործնական լաբորատոր պայմաններում:
«Շրջած դասասենյակի» կոնցեպտը ենթադրում է դասարանային գործունեության այլ մեթոդ. աշակերտները տանն են յուրացնում առցանց տեղադրված տեսական նյութը և այնուհետ դասարանում կիրառում ձեռք բերած գիտելիքը գործնականում: Ուսումնական առարկաները տարբեր են ու ներառում են մաթեմատիկա և զարգացող տեխնոլոգիաներ, խորացված լաբորատոր փորձեր, օրիգինալ փաստաթղթերի վերլուծություն, բանավեճի կամ խոսքի մշակույթ, ընթացիկ իրադարձության քննարկում, խմբային վերլուծություն, նախագծի վրա հիմնված ուսուցում, հմտությունների զարգացում և այլն:
Սա ուսուցման ակտիվ մեթոդ է, որը զարգացնում է մտածական այնպիսի կարողություններ, ինչպիսիք են խնդիրների սահմանումը, համագործակցային հմտությունը, խնդիրների լուծումը: Աշակերտները լուծում են բարդ խնդիրներ, աշխատում են խմբերով, հետազոտություն են անցկացնում և ձևավորում նոր գիտելիք իրենց ուսուցչի և դասընկերների օգնությամբ:
Հուլիսի 19-ին դասընթացն ավարտած աշակերտներին հանդիսավոր պայմաններում հանձնվեցին ավարտական վկայականները: Նրանց շնորհավորելու էին եկել մարզպետի տեղակալ Հովհաննես Թադևոսյանը, մարզպետարանի կրթության, մշակույթի և սպորտի վարչության պետի տեղակալ Արփինե Մատինյանը, «Լույս» հիմնադրամի կրթական ծրագրի գործադիր տնօրեն Ժաքլին Կարաասլանյանը, «Լույսի» կրթաթոշակառուները, հյուրեր: Մարզի ղեկավարի և իր անունից «Լույսի» նախաձեռնությունները և մարզում իրականացված ծրագրերը ողջունեց Հ. Թադևոսյանը: Նա իր ելույթում շնորհակալություն հայտնեց հիմնադրամին, ինչպես նաև Վանաձորի տեխնոլոգիական կենտրոնին մարզի դպրոցականներին ու երիտասարդներին կրթական բարձրակարգ ծրագրեր մատուցելու համար: Դասընթացի շրջանավարտներին շնորհավորեցին նաև Ժակլին Կարաասլանյանը, Վանաձորի տեխնոլոգիական կենտրոնի խորհրդատու Պատվական Հախինյանը: