Պաշտոնական էլ. փոստ
(միայն www.e-citizen.am համակարգով ծանուցումների համար)
Տեղեկատվական կենտրոն
Նորություններ
Դինքի անունը կրող անտառում եղևնի տնկեց Ռաքել Դինքը
23.06.2017
«Էյ -Թի Փի» ընկերությունը, որն անտառվերականգնման ծրագրեր է իրականացնում ողջ հանրապետությունում, բնապահպանական ծրագրեր է իրականացնում նաև Լոռու մարզի Մարգահովիտ համայնքում: Այստեղ է գտնվում Միրաք ընտանիքի անտառավերականգնման տնկարանը, որի կողմից տարեկան արտադրվող 100 հազարավոր տնկիներն օգտագործվում են անտառատնկման նպատակով:
Կազմակերպության նախաձեռնությամբ համայնքի մերձակայքում պոլսահայ լրագրող, «Ակոսի» գլխավոր խմբագիր Հրանտ Դինքի անունը կրող անտառ է տնկվել: Այստեղ մտավորականի տարիքին համապատասխան՝ 53 եղևնի կա, և նրանց թիվը յուրաքանչյուր տարի ավելանալու է ևս մեկով:
Լոռու մարզպետ Արթուր Նալբանդյանի, Գուգարաց թեմի առաջնորդ տեր Սեպուհ արքեպիսկոպոս Չուլջյանի, փոխմարզպետ Հովհաննես Թադևոսյանի ուղեկցությամբ Մարգահովիտ այցելեց և Դինքի անունը կրող անտառում իր ձեռքով հերթական եղևնին տնկեց մտավորականի կինը՝ Ռաքել Դինքը:
-Անտառի մասին տեղեկացել էի, բայց առաջին անգամ էի այստեղ և շատ ազդվեցի: Ուրախ եմ,որ Հայաստանում նման աշխատանքներ են կատարվում,-ասաց նա:
Կազմակերպության գործունեությունը և մարզում իրականացված աշխատանքներն իր խոսքում բարձր գնահատեց մարզի ղեկավարը.
- Բնապահպանական,անտառվերականգնման առումով «Էյ –Թի- Փի» ընկերության գործունեությունը մարզում շատ կարևոր է: Ընկերության կողմից իրականացվող ծրագրերը կարևորվում են նաև այն առումով, որ աշխատում են նաև ուսումնական հաստատությունների հետ, դպրոցականների համար կազմակերպում են բնապահպանական թեմաներով դասընթացներ, էքսկուրսիաներ, և արվում է այն ամենը, ինչ անհրաժեշտ է բնության պահպանության համար,-ասաց մարզպետը:
Ռաքել Դինքը խոստացավ հնրավարության սահմաններում առավել հաճախ լինել այստեղ:
