Տեղեկատվական կենտրոն
Նորություններ
Աշխատանքային խորհրդակցություն
19.06.2017
Լոռու մարզպետ Արթուր Նալբանդյանը մարզպետարանի պատասխանատու աշխատողների մասնակցությամբ այսօր անցկացրեց աշխատանքային խորհրդակցություն:
Մինչ օրակարգային հիմնական հարցերին անցնելը մարզի ղեկավարը մի շարք հանձնարարականններ տվեց առաջիկայում ՀՀ վարչապետի՝ Լոռու մարզ կատարվելիք այցի հետ կապված, ինչպես նաև՝ մինչև սեպտեմբեր մարզի ևս 5-6 դպրոցներում «Սմարթ» դասասենյակների վերանորոգման և կահավորման վերաբերյալ:
Լոռու մարզպետարանի աշխատակազմի ղեկավար Նարեկ Սարգսյանն անդրադարձավ նախորդ շաբաթվա ընթացքում մարզի ղեկավարի կողմից տրված հանձնարարականների կատարման ընթացքին և կազմակերպված աշխատանքային քննարկումների արդյունքներին:
Համայնքներում հարկերի հավաքագրման ընթացքը ներկայացրեց մարզպետարանի ֆինանսական և սոցիալ-տնտեսական զարգացման վարչության պետ Հրայր Պապոյանը: Նրա տեղեկացմամբ, կիսամյակային տվյալներով սեփական եկամուտների հավաքագրման ցուցանիշերով մարզը սահամանված պլանից ետ է 151 մլն 675 հազար դրամով, հողի հարկի ցուցանիշերով՝ 56 մլն 445 հազար և գույքահարկի ՝ 39 մլն դրամով: Մարզի ղեկավարը փոխմարզպետներին հանձնարարեց հետևողական աշխատանքներ տանել հավաքագրումների բացը լրացնելու ուղղությամբ:
«Ազգ-բանակ» միջոցառումների ընթացքը ներկայացրեց մարզպետարանի կրթության, մշակույթի և սպորտի վարչության պետ Մինաս Սայադյանը: Նա տեղեկացրեց, որ վարչության աշխատակիցները հանդիպումներ են ունենում մարզի հանրակրթական դպրոցների 8-9-րդ դասարանների աշակերտների ծնողների հետ և բացատրական աշխատանքներ տանում: Արդյունքում՝ 16 ծնող ցանկություն է հայտնել, որ իր երեխան 9-րդ դասարանն ավարտելուց հետո ուսումը շարունակի ռազմական ուսումնարանում: Գործընթացը շարունակական բնույթ է կրելու: Վարչության պետը ներկայացրեց նաև ՀՀ կառավարության կողմից իրականացվող՝ դպրոցականների ամառային հանգստի կազմակերպման 2017 թ. ծրագիրը՝ նշելով, որ ամառային ճամբարներում իրենց հանգիստը կանցկացնեն նաև Լոռու մարզի 415 դպրոցականներ:
«Մաքուր Հայասատան» ծրագրի ընթացքին անդրադառնալով՝ մարզպետարանի հողաշինության և հողօգտագործման բաժնի պետ Արտակ Օհանյանը տեղեկացրեց, որ մարզի 348 աղբավայրերից 340-ը փակված և տեղափոխված են, մինչդեռ, ըստ բաժնի ուսումնասիրությունների, փակման ենթակա են ևս 3-ը, թեև դրա հետ կապված ֆինանսական և տեխնիկական դժվարություններ են ծագել:
-«Մաքուր Հայաստան» ծրագրի շրջանակներում փակման ենթակա և կոնսերվացման դժվարություններ պարունակող աղբավայրերի աշխատանքները պատշաճ կազմակերպելու և աղբահանության ծառայություններն ապահովելու նպատակով համապատասխան ազդակիր համայնքներին անհրաժեշտ պետական օժանդակություն տրամադրելու վերաբերյալ մարզպետի հանձնարարությամբ քննարկում է կազմակերպվել, և գրություն է ուղարկվել ՀՀ վարչապետին՝ 5 աղբատար մեքենայի և շուրջ 20 մլն դրամի աջակցության խնդրանքով,-նշեց Ա. Օհանյանը՝ տեղեկացնելով նաև, որ ներկայում աշխատանքներ են տարվում համայնքների հետ՝ աղբահանության պատշաճ կազմակերպման ուղղությամբ: Վերջինիս հետ կապված մարզի ղեկավարը մի շարք հանձնարարականներ ևս տվեց:
Գյուղատնտեսական աշխատանքների ընթացքը ներկայացրեց Գյուղատնտեսության և բնապահպանության վարչության պետ Գրիգոր Հակոբյանը: Նա տեղեկացրեց, որ ՀՀ գյուղատնտեսության նախարարությանը 2500 տոննա ազոտական պարարտանյութի հայտ է ներկայացվել, որից արդեն ստացվել է 2200-ը: Դիզվառելիքը, ըստ ներկայացված հայտերի, առաջիկայում ևս կստացվի:
Քննարկվեցին նաև առաջիկայում կազմակերպվելիք միջոցառումների և աշխատանքային այլ հարցեր, տրվեցին հանձնարարականներ: