Լոռու մարզպետի աշխատակազմ

ՀՀ վարչապետ Կարեն Կարապետյանի մարզային այցելությունների ընթացքում համայնքների բնակիչները հարցեր էին բարձրացնում, որոնք ընդգրկված չէին իրենց համայնքների զարգացման ծրագրերում, ոմանք անգամ տեղյակ չէին, որ նմանատիպ ծրագիր է մշակվում, ուստի անհրաժեշտություն էր առաջացել ծրագրերը վերանայելու և հանրային լսումներ կազմակերպելու դրանք լրամշակելու համար:
ՀՀ վարչապետի՝ համայնքների 5-ամյա զարգացման ծրագրերի վերանայման և համայնքներում այս նպատակով հանրային լսումների կազմակերպման վերաբերյալ հանձնարարականի կատարումը չուշացավ:
Լոռու մարզպետ Արթուր Նալաբանդյանի հանձնարարությամբ այսօրվանից սկսած ծրագրերի քննարկման նպատակով մարզի մի շարք համայնքներում անց են կացվում հանրային լսումներ, որոնց մասնակից են դառնում նաև փոխմարզպետները: Նպատակը ռեալ իրատեսական ծրագրեր ունենալն է, որով համայնքը կկարողանա առաջնորդվել առաջիկա 5 տարիներին:
Ապրիլի 12-ին Լոռու մարզպետի տեղակալ Արսեն Դարբինյանը եղավ Թումանյանի տարածաշրջանի Ճոճկան, Շնող, Ախթալա, Օձուն, փոխմարզպետ Հովհաննես Թադևոսյանը՝ Սպիտակի տարածաշրջանի Ջրաշեն համայնքներում՝ մասնակցելով զարգացման 5-ամյա ծրագրերի հանրային լսումներին, որոնց մասնակցում էին նաև ավագանու անդամներ, համայնքների ակտիվ բնակիչները:Քննարկումների ընթացքում շեշտը դրվեց համայքների համար կարևորություն ունեցող հարցերը լուրջ հիմնավորումների պայմանով զարգացման ծրագրերում անպայման ներառելու խնդրին: Հատկապես կարևորվեց սոցիալական հիմնախնդիրների լուծմանն ուղված արտադրական կարողությունների, գյուղատնտեսական կոոպերատիվների կազմակերպման հնարավորությունների օգտագործումը:

Փոխմարզպետների մասնակցությամբ առաջիկա օրերին հանրային քննարկումներ տեղի կունենան նաև մարզի մյուս համայնքներում: