Տեղեկատվական կենտրոն
Նորություններ
Մարզի ղեկավարը հյուր էր խնամատար ընտանիքում
29.03.2017
Արդեն տասն ամիս է, վանաձորի բնակչուհի Գայանե Ոփյանի խնամատար ընտանիքում են բնակվում ու դաստիարակվում քույրեր Սյուզաննա և Հայկուշ Մուրադյանները: Նրանք 2013թ.-ից առանց ծնողական խնամքի մնալով՝ ապաստան էին գտել մանկատանը և միայն երջանիկ պատահականությամբ, թե աստծո կամոք հայտնվեցին իրենց անսահման սիրող, ջերմությամբ շրջապատած տատիկի, պապիկի, հոր և մոր խնամքի ներքո:
Այսօր Սյուզանն տոնում էր իր ծննդյան 15-ամյակը. նրա տարեդարձը չափազանց հիշարժան էր, քանի որ գեղեցկատես աղջնակին շնորհավորելու էր եկել մարզի ղեկավար Արթուր Նալբանդյանը՝ մարզպետարանի ընտանիքի, կանանց և երեխաների իրավունքների պաշտպանության բաժնի պետ Սասուն Խեչումյանի, մարզպետարանի աշխատակիցների ուղեկցությամբ: Մարզպետը Սյուզաննային մաղթեց անսահման երջանկություն և որ նրա բոլոր երազանքները իրականություն դառնան: Ինքն էլ իր հերթին պատրաստակամություն հայտնեց աջակցել՝ երեխաների ապագայի կերտման հարցում: Նա շնորհակալություն հայտնեց խնամատար ընտանիքի բոլոր անդամներին երեխաների համար հոգատարության, ջերմության մթնոլորտ, տաքուկ ընտանեկան անկյուն ստեղծելու համար:
Աղջիկները հաճախում են Վանաձորի թիվ 2 հիմնական դպրոցը, և մարզի ղեկավարին տեղեկացրեցին, որ խնամատար ընտանիք տեղափոխվելուց հետո նրանց առաջադիմությունը կտրուկ բարձրացել է: Սյուզաննան և Հայկուշը կողմանորոշվել են անգամ մասնագիտության ընտրության հարցում: Սյուզաննան ցանկանում է դեղագործ դառնալ, Հայկուշը՝ մատնահարդար, իսկ ծնողները խոստանում են անել հնարավորն ու անհնարինը, որպեսզի նրանց բոլոր երազանքներն իրականություն դառնան:
Ա. Նալբանդյանը հոբելյարին տարեդարձի առթիվ ծաղկեփունջ և դրամական պարգև հանձնեց և խոստացավ կրկին հյուր գալ: