Տեղեկատվական կենտրոն
Նորություններ
Մարզպետը կոչ արեց լավ սովորել, լինել նպատակասլաց ու պատասխանատու աշխատանքի նկատմամբ
03.03.2017
Լոռու մարզպետարանի նախաձեռնությամբ կազմակերպվող մարզի հանրակրթական դպրոցների աշակերտների այցելությունները մարզի գլխավոր վարչական կառույց շարունակվում են: Մարտի 3-ին մարզպետարանի հյուրերն էին Ստեփանավանի թիվ 1 հիմնական դպրոցի 8-9-րդ դասարանների 15 աշակերտներ:
Դպրոցի տնօրեն Գայանե Սարգսյանի ուղեկցությամբ նրանք եղան մարզպետարանի Կրթության, մշակույթի և սպորտի, Առողջապահության և սոցիալական ապահովության, Գյուղատնտեսության և բնապահպանության, ՏԻ և ՀԳՄ հարցերով վարչություններում, Ընտանիքի, կանանց և երեխաների իրավունքների պաշտպանության բաժնում՝ ծանոթանալով նրանց գործառույթներին և համապատասխան ոլորտներում իրականացվող ծրագրերին: Նրանք անկաշկանդ իրենց հուզող հարցերն ուղղեցին ստորաբաժանումների ղեկավարներին: Այնուհետև դահլիճում մարզպետարանի աշխատակազմի ղեկավարի տեղակալ Վալերի Խաչատրյանը սլայդերի միջոցով ներկայացրեց մարզպետարանի կառուցվածքը, ոլորտառոլորտ իրականացվող գործառույթները, ծրագրերը, արտաքին համագործակցությունը և այլն:
Երեխաների համար ամենասպասված պահը մարզի ղեկավարի հետ հանդիպումն էր: Նա անկաշկանդ զրույցի հրավիրեց երեխաներին, հարցեր ուղղելու հնարավորություն ընձեռելով և առաջարկելով կիսվել տպավորություններով: Երեխաները նշեցին, որ բավականին տպավորված են այցից, հասցրել են իրենց հետաքրքրող շատ հարցերի պատասխաններ ստանալ: Առանձնացրին հատկապես Ընտանիքի, կանանց և երեխաների իրավունքների պաշտպանության բաժինը, որը, որպես երեխաների իրավունքների պաշտպանություն իրականացնող ստորաբաժանում, ամենից շատն էր հետաքրքրել նրանց:
Երեխաների հարցերը, ուղղված մարզի ղեկավարին, բավականին հետաքրքիր էին:
-Պարոն Նալբանդյան, ինչպիսի՞ աշխատանքային ուղի եք անցել:
-Ոչ մի ձեռքբերում մարդկանց հենց այնպես չի տրվում: Ինչ-որ բանի հասնելու համար ես շատ եմ աշխատել, եղել եմ նպատակասլաց ու չափազանց պատասխանատու: Ընդամենը 29 տարեկանում եղել եմ «Ալավերդու հացի գործարան» ԲԲԸ-ի փոխտնօրենը, 32 տարեկանում՝ «Հայաստանի էլեկտրական ցանցեր» ՓԲԸ-ի «Դեբեդ» մասնաճյուղի «Թումանյանի էլեկտրական ցանցեր»-ի տնօրենը, 34 տարեկանում ընտրվել եմ Ալավերդու քաղաքապետ՝ դառնալով ամենաերիտասարդ քաղաքապետը հանրապետությունում, ապա՝ 39 տարեկանում ինձ է վստահվել Լոռու մարզպետի պաշտոնը: Ես դարձյալ ամենաերիտասարդ մարզպետն էի: Ձեզ, որպես մարզի ղեկավար ու ձեր ավագ ընկեր՝ խորհուրդ եմ տալիս լավ սովորել, ունենալ մեծ պատասխանատվություն և սեր աշխատանքի նկատմամբ: Լավ կրթություն չստացած, մասնագիտություն չունեցող մարդը պոտենցիալ աղքատ է: Կրթված սերունդն է, որ պետք է ապահովի մեր երկրի կայուն զարգացումն ու առաջընթացը,-ասաց նա: Մարզպետը կոչ արեց նաև հաճախակի ռազմահայրենասիրական դասերի անցկացման նախաձեռնություն ցուցաբերել, ասենք՝ միասին հայրենասիրական ֆիլմեր նայել, երկրպագել մեր չեմպիոններին և այլն:
Երեխաները հետաքրքրվեցին նաև, թե ինչպես կարելի է քաղաքական գործիչ դառնալ:
-Խորհուրդ կտամ դառնաք լավ մասնագետ ձեր նախընտրելի ոլորտում, իսկ քաղաքականությամբ կզբաղվեք, երբ առավել հասուն տարիքի լինեք ու հստակ կողմնորոշում ունենաք,-ասաց Ա. Նալբանդյանը:
Նա հանգամանորեն ներկայացրեց նաև Լոռին Սմարթ մարզ հայտարարելու նախաձեռնությունը և այդ ուղղությամբ իրականացվող ծրագրերը՝ կոչ անելով առաջարկություններով ևս մասնակից դառնալ գաղափարի իրագործմանը:
-Ուզում եմ, որ լավատես լինեք ու այսօվանից սկսած՝ մասնակից դառնանք սեփական երկրի բարեկեցիկ ապագայի կերտմանը,-հանդիպումը եզրափակելով՝ ասաց Ա. Նալբանդյանը: