Տեղեկատվական կենտրոն
Նորություններ
Վանաձորի տեխնոլոգիական կենտրոնի հյուրերն էին ալավերդցի ուսանողները
09.02.2017
Լոռու մարզպետ Արթուր Նալբանդյանի հրավերով երեկ ճանաչողական այցելությամբ Վանաձորի տեխնոլոգիական կենտրոնում (ՎՏԿ) հյուրընկալվեցին Ալավերդու միացյալ ուսխորհրդի և «Նոր Ալավերդի» ՀԿ անդամները: Նրանց ուղեկցում էր Ալավերդու քաղաքապետ Կարեն Փարեմուզյանը:
Հյուրերին դիմավորեց և կենտրոնի պայմաններին ծանոթացրեց բիզնես ծրագրերի համակարգող Պատվական Հախինյանը: Այցելուները եղան հարկաբաժիններում, ծանոթացան նորագույն տեղեկատվական տեխնոլոգիաներով (ՏՏ) հագեցած լսարանների ու աշխատասենյակների պայմաններին, ապա հանդիպում ունեցան մարզպետ Ա. Նալբանդյանի, մարզպետի խորհրդական Լևոն Ասլանյանի հետ:
-Լոռին գիտատեխնիկական առաջընթացի կենտրոններից մեկը դարձնելու լուրջ հիմնավորումներով մեր առաջարկը հավանության արժանացավ ՀՀ կառավարության կողմից և արդյունքում ունեցանք Ձեռնարկությունների Ինկուբատոր հիմնադրամի, ՀՀ կառավարության և Համաշխարհային բանկի 5 մլն ԱՄՆ դոլարի ֆինանսավորմամբ կյանքի կոչված այս հրաշալի ծրագիրը,-ասաց մարզպետը:
Նա մեկ անգամ ևս անդրադարձավ Լոռին «Սմարթ մարզ» հայտարարելու գաղափարին, շեշտելով, որ մեր փոքրիկ, բնական ռեսուրսներով աղքատիկ Հայաստանն ու մասնավորապես՝ Լոռու մարզը, Երկիր մոլորակի գիտատեխնիկական խելահեղ զարգացումների մրցակցությանը կարող է և պետք է դիմակայի իր ինտելեկտով, մեր ժողովրդին բնորոշ մտավոր հարստությամբ: Հիմնավորված հաշվարկներով մինչև 2025 թվականը հանրապետությունը ՏՏ ոլորտի 40 հազար մասնագետի կարիք է ունենալու:
-Ես կասկած չունեմ, որ բարձր գաղափարների այդ շտեմարանում իրենց արժանի տեղն են ունենալու մեր մարզի լավագույն ներկայացուցիչները: Մենք դատապարտված ենք տարածաշրջանում լավագույնը լինելու,-ասաց մարզպետը, ավելացնելով, որ աջակցելու և սատարելու է այս գործում շահագրգիռ յուրաքանչյուր երիտասարդի:
-ՎՏԿ-ի առաքելությունն է` Վանաձորը վերածել տեղեկատվական և բարձր տեխնոլոգիաների տարածաշրջանային և միջազգային կենտրոնի՝ ստեղծելով հնարավորությունների և ծառայությունների այնպիսի զարգացող միջավայր, որը կնպաստի աշխատատեղերի ստեղծմանը, կաջակցի տաղանդավոր երիտասարդներին և ընկերություններին՝ կյանքի կոչելու նորարար բիզնես-գաղափարներ՝ նպաստելով տարածաշրջանի կայուն զարգացմանը,-ասաց Պատվական Հախինյանը՝ նշելով այն ծառայությունները, որով կենտրոնն աջակցում է տեխնոլոգիական ընկերություններին:
Ա. Նալբանդյանը, Լ.Ասլանյանը, Պ. Հախինյանը պատասխանեցին ուսանողներին հետաքրքրող հարցերին: