Լոռու մարզպետի աշխատակազմ

Տարեցների միջազգային օրվա կապակցությամբ, ավանդույթի համաձայն, Լոռու մարզպետ Արթուր Նալբանդյանն այցելեց երկու երկարակյաց տարեցների՝ անձամբ իր շնորհավորանքի ու բարեմաղթանքի խոսքերը հղելու նրանց:
Առաջինը մարզի ղեկավարն ուղղևորվեց Այգեհատ համայնք: Նրան ուղեկցում էին Լոռու մարզպետարանի առողջապահության և սոցիալական ապահովության վարչության պետ Սամվել Լամբարյանը և Տեղեկատվության և հասարակայնության հետ կապերի բաժնի պետ Սամվել Խալաթյանը:
Այստեղ մարզպետը շնորհավորեց համայնքի ամենաերկարակյաց տարեցի՝ 100- ամյա Թալալ Շահվերդյանի, դարեդարձը՝ մաղթելով, որ նա կյանքի երկրորդ դարում քաջառողջ լինի և վայելի անհոգ ու երջանիկ ծերություն:
Թալալ տատը 7 զավակ ունի, 17 թոռ, 8 ծոռ: Չնայած ապրած կյանքի դժվարություններին, իրեն երջանիկ կին է համարում, քանի որ շրջապատված է հարազատներով ու մտերիմ մարդկանցով: Մարզի ղեկավարին էլ արևշատություն ու առողջություն մաղթեց:
Վանաձոր համայնքում Ա. Նալբանդյանը հյուրընկալվեց 89-ամյա Սեդիկ Վարդումյանի տանը: Վերջինս «Հայկական Կարիտաս» բարեսիրական հասարակական կազմակերպության «Տնային խնամք» ծրագրի 100 միայնակ ու անժառանգ շահառուներից մեկն է: Կազմակերպությունն իրականացնում է միայնակ տարեցների խնամքը՝ տրամադրելով հումանիտար օգնություն, մատուցելով առողջապահական աջակցություն:
Ա. Նալբանդյանը, շնորհավորելով Սեդիկ Վարդանյանին Տարեցների միջազգային օրվա կապակցությամբ, միաժամանակ իր երախտագիտությունը հայտնեց «Հայկական Կարիտաս» կազմակերպությանը, բոլոր աշխատակիցներին՝ տարեցների նկատմամբ ցուցաբերած նվիրումի, ամենօրյա հոգատար աշխատանքի համար:
Մարզի ղեկավարը տարեցներին շնորհավորագրեր և դրամական պարգև հանձնեց:
Տարեցներին միջազգային օրվա կապակցությամբ շնորհավորելու համար Վանաձորի ծերատուն և «Հույսի տուն» այցելեց Լոռու փոխմարզպետ Տիգրան Բադոյանը, ուր տարեցների համար մարզպետ Արթուր Նալբանդյանի կողմից հյուրասիրություն էր կազմակերպվել:
Տ. Բադոյանին ուղեկցում էր Լոռու մարզպետարանի աշխատակազմի առողջապահության և սոցիալական ապահովության վարչության սոցիալական բաժնի պետ Վալերի Ջաղինյանը:
Փոխմարզպետը տարեցներին շնորհավորանքի և ջերմ բարեմաղթանքի խոսքեր հղեց Լոռու մարզպետի և իր անունից՝ մաղթելով անհոգ ծերություն: