Տեղեկատվական կենտրոն
Նորություններ
«Հայաստանի տաք գույները»
10.09.2013
Սեպտեմբերի 9-ին այս խորագիրը կրող ցուցահանդեսը բացվեց Հայաստանի նկարիչների միության ցուցասրահում: Կազմակերպիչներն էին ՀՀ մշակույթի նախարարությունը, ՀՀ նկարիչների միությունը, Լոռու մարզպետարանը, Հայ Առաքելական եկեղեցու Գուգարաց թեմը, «Փյունիկ» հիմնադրամը, «Լոռու ձոր» հայրենակցական միությունը:
Ներկայացված աշխատանքները հիմնականում ստեղծվել են անցած տարվա հոկտեմբերի 5-ից 20-ին Լոռու մարզի Օձուն գյուղում անցկացված «Հայկական ներկապնակ» բացօթյա գեղանկարչության միջազգային երկրորդ փառատոնի օրերին՝ Ռուսաստանի Դաշնության, Ղազախստանի, Բելառուսի, Լիտվայի, Լեհաստանի, Հայաստանի և Լեռնային Ղարաբաղի Հանրապետության արվեստագետների մասնակցությամբ: Ըստ փառատոնի կազմակերպիչների, հաջորդ փառատոնը տեղի կունենա սեպտեմբերի վերջին Գյումրիում և կնվիրվի Գյումրին ԱՊՀ երկրների մշակութային մայրաքաղաք հռչակելուն:
Երկրի գլխավոր ցուցասրահում ցուցադրվեցին ավելի քան 150 գեղանկարչական աշխատանքներ՝ բնանկարներ, պատմաճարտարապետական հուշարձանների պատկերներ, հիշարժան վայրեր: Ցուցահանդեսում տեղ էին գտել հիմնականում Լոռվա բնապատկերներ:
Ողջունեցին «Լոռու ձոր» ՀԿ նախագահ Սերգո Երիցյանը, ՀՀ մշակույթի նախարարության ժամանակակից արվեստի վարչության պետ Սեյրանուհի Գեղամյանը, ՀՀ Լոռու մարզպետ պարոն Արթուր Նալբանդյանի կողմից՝ մարզպետարանի տեղեկատվության և հասարակայնության հետ կապերի բաժնի պետ Սամվել Խալաթյանը: