Լոռու մարզպետի աշխատակազմ

Տարեցների միջազգային օրվա կապակցությամբ Լոռու մարզպետարանի նախաձեռնությամբ կազմակերպվել էր միջոցառումների մի ամբողջ շարք՝ վանաձորցի տարեցներին շնորհավորելու և նրանց վաստակը գնահատելու համար: Լոռու մարզպետ Արթուր Նալբանդյանը, Գուգարաց թեմի առաջնորդ Սեպուհ արքեպիսկոպոս Չուլջյանը, մարզպետարանի առողջապահության և սոցիալական ապահովության վարչության պետ Սամվել Լամբարյանը, կրթության, մշակույթի և սպորտի վարչության մշակույթի բաժնի պետ Արամ Ռևազյանը, մարզպետարանի մի խումբ աշխատակիցներ եղան Վանաձորի «Հույսի տուն» տարեցների հանգստյան տանը և ծերատանը:
«Հույսի տունը» հիմնադրվել է 2006 թվականին: Տնօրեն Վերոնիկա Հունանյանը ամուսնու հետ միասին հաստատությունը հիմնել է ծնողների հիշատակի համար, որոնց երկար տարիներ խնամել է հիվանդ վիճակում: «ՙՀույսի տունը» գործում է նախկին թիվ 18 գիշերօթիկ դպրոցի տարածքում: Մասնաշենքն ամուսինները գնել ու վերանորոգել են ամբողջությամբ՝ համապատասխանեցնելով միջազգային չափանիշներին: Այստեղ ներկա պահին բնակվում է 64 տարեց, որոնցից 14-ը՝ անկողնային վիճակում: Հաստատությունը գործում է առանց պետական հովանավորության, ամուսինների ընտանեկան բիզնեսից կատարվող ներդրումների, երբեմն նաև նրանց անձնական կապերի շնորհիվ հայթայթվող միջոցներով:
Տարեցների համար մարզպետի նախաձեռնությամբ հյուրասիրություն էր կազմակերպվել: Նրանց օրհնության խոսք հղեց Գուգարաց թեմի առաջնորդը՝ տան բնակիչներին մաղթելով առողջություն և երկար տարիների կյանք: Տարեցներին շնորհավորեց նաև Արթուր Նալբանդյանը: Նա առանձնահատուկ կարևորեց տնօրինության անձնվեր աշխատանքը, նվիրումը տարեցների նկատմամբ:
- Իսկական բարեգործությունը դուք եք կատարում, քանզի անշահախնդիր օգնում եք անպաշտպան ու օգնության կարիք ունեցող ծերերին,- ասաց նա: Հյուրերը ծանոթացան նաև հաստատության շենքային պայմաններին: Տարեցներից ոմանք անակնկալներ էին պատրաստել. նրանք հանդես եկան գեղարվեստական կատարումներով, ասմունքով: Տան բնակիչներին իրենց կատարումներով ողջունեցին ՀՀ վաստակավոր արտիստ Ստեփան Դալլաքյանը, պատանի դուդուկահար Վահան Սոֆյանը, դերասան, ասմունքող Իվան Անտոնյանը:
Հյուրերը եղան նաև Վանաձորի ծերատանը, ուր ներկայումս բնակվում է 50 տարեց: Այստեղ ևս օրհնության խոսք հղեց տեր Սեպուհ աքրեպիսկոպոս Չուլջյանը: Հյուրասիրության սեղանների շուրջ տարեցներին շնորհավորեց Արթուր Նալբանդյանը՝ մաղթելով անհոգ ծերություն: Այստեղ ծերերին իրենց կատարումներով ողջունեցին Ստեփան Դալլաքյանը, Շահումյան համայնքի ՙՄայրասար՚ համույթը, Իվան Անտոնյանը, Վահան Սոֆյանը: Նույն օրը Լոռու մարզպետարանի առողջապահության և սոցիալական ապահովության բաժնի պետ Վալերի Ջաղինյանը Ա. Նալբանդյանի անունից դրամական պարգևներ հանձնեց 100-ամյակի շեմը հատած տարեցներ, վանաձորաբնակ Ազգանուշ Հովհաննիսյանին, Գոհար Գոգչյանին, Հասմիկ Մխիթարյանին և Լուսիկ Անդրեասյանին: