Տեղեկատվական կենտրոն
Նորություններ
Շնորհավո՜ր տոնդ, Վանաձոր
02.10.2011
,,Վանաձորի օր,, տոնակատարությանը նվիրված միջոցառումները մեկնարկել էին դեռևս մի քանի օր առաջ՝ տարբեր մշակութային կենտրոններում ու կրթական հաստատություններում, իսկ գլխավոր միջոցառումն անցկացվեց հոկտեմբերի 1-ին՝ համախմբելով մարզկենտրոնի գրեթե բոլոր կոլեկտիվներին՝ դպրոցներ, մանկապարտեզներ, մարզական ու մշակութային կենտրոններ, հասարակական կազմակերպություններ: Վաղ առավոտից տոնական տրամադրության մեջ էր Հայքի հրապարակը: Հնչում էր տոնական երաժշտություն, հրապարակում շրջում էին հեքիաթների հերոսների կերպարներ մարմնավորող՝ գունազարդ հագուստով հանդերձավորված երիտասարդ դերասանները, ովքեր հեքիաթներ էին պատմում փոքրիկներին, երգում ու արտասանում նրանց հետ:
Հրապարակում կազմակերպվել էր նաև ,,ՙԽաչվող ուղիներ,,, ,,Օրրան,,, ,,Զանգակատուն,, հասարակական կազմակերպություններում գործող ուսուցողական խմբակների սաների ձեռքի աշխատանքների ցուցահանդես-վաճառք, որից գոյացած հասույթը կօգտագործվի քաղաքի կարիքների համար: Վաղ առավոտից տոնական միջոցառումներ էին մեկնարկել նաև Դիմաց թաղամասի Երիտասարդական պուրակում, թիվ 1, 3 մշակույթի տների հարակից տարածքներում, ուր կավճանկարչական աշխատանքներ, երգեր, պարեր ու ասմունք էին ներկայացնում քաղաքի մշակութային օջախները: Մարզկենտրոնի բոլոր մարզական հաստատություններում ևս մեծ ոգևորություն էր տիրում: Երիտասարդական այգում, մարզատեխնիկական հասարակական կազմակերպության կողմից անց էին կացվում մարզական մրցաշարեր: Հրանտ Մաթևոսյանի անվան զբոսայգում՝ արձակագրի արձանի մոտ, անցկացվեց միջոցառում մարզկենտրոնի գրողների և մտավորականների մասնակցությամբ:
Հանդիսություն էր կազմակերպվել նաև ի պատիվ վանաձորցի անվանի դուդուկահար, մշակույթի երախտավոր, Արտավազդ Տեր-Հովհաննիսյանի կանգնեցված Դուդուկի արձանի մոտ:
,,ՙՎանաձորի օր,, տոնակատարությանը մասնակցելու համար բազմաթիվ հյուրեր, համայնքապետեր ու պաշտոնատար անձինք էին ժամանել հանրապետության տարբեր մարզերից ու քաղաքներից: Վանաձորում էին ,,ՙՎիվաՍել ՄՏՍ,,-ի գլխավոր տնօրեն Ռալֆ Յիրիկյանը, Հայաստանում Բուլղարիայի արտակարգ և լիազոր դեսպան Գեորգի Կարաստամատովը, Փասադենա-Վանաձոր քույր քաղաքների համանախագահ Մասյա Մանթեզը, պատվիրակության կազմում էին ևս 8 հյուրեր՝ Փասադենայից: Նրանց համար ընդունելություն էր կազմակերպվել Վանաձորի քաղաքապետարանում: Հյուրերն այցելեցին նաև թիվ 2 նախադպրոցական հաստատություն, ուր այս տարվա մայիսից հիմնանորոգման աշխատանքներ են իրականացվում ,,Փրկեցե՜ք երեխաներին,, կազմակերպության ֆինանսական աջակցությամբ:Հյուրերն իրենց գոհունակությունը հայտնեցին կատարված աշխատանքների վերաբերյալ:
Օրվա գլխավոր միջոցառումը մեկնարկեց ժամը 17-ին՝ Հայքի հրապարակում: Այստեղ հավաքված հազարավոր վանաձորցիներին ու հյուրերին շնորհավորանքի խոսք հղեց քաղաքապետ Սամվել Դարբինյանը, ում անմիջական նախաձեռնությամբ էլ արդեն 11-րդ անգամ նշվում է քաղաքի տոնը:
Շնորհավորանքի խոսք ասաց նաև Լոռու մարզպետ Արթուր Նալբանդյանը:
-Վանաձորը հանրապետությունում երրորդ քաղաքն է իր մեծությամբ ու բնակչության թվաքանակով և մենք հպարտանում ենք քաղաքի վերջին տարիների հաջողություններով ու գիտակցում, որ այդ հաջողությունների գրավականը միասնականությունն է,- ասաց նա:
Օրհնության խոսք հղեց Վանաձորի Սուրբ Աստվածածին եկեղեցու հոգևոր հովիվ տեր Օհան քահանա Լուսարարյանը: Վանաձորի քաղաքապետարանի աշխատակազմի ղեկավար Գագիկ Սիմոնյանն ընթերցեց համայնքի ավագանու որոշումը՝ Ռալֆ Յիրիկյանին ,,ՙՎանաձորի պատվավոր քաղաքացու,, կոչում շնորհելու մասին՝ հաշվի առնելով մարզկենտրոնում նրա կողմից իրականացված բարեգործական ծրագրերն ու մեծ ներդրումները: Ռ.Յիրիկյանը ներկաներին ողջունելու հնարավորություն ստացավ արդեն որպես համաքաղաքացի: Նա կոչ արեց յուրաքանչյուր խոսք գործով ապացուցել, սիրել հայրենիքն ու քաղաքը՝ այդ սերն ապացուցելով որևէ օգտակար գործողությամբ: Վերջերս Ռալֆ Յիրիկյանի կողմից բարեկարգ բնակարանների բանալիներ էր հանձնվել տնակային ավաններում բնակվող 20 ընտանիքի: Այդ ընտանիքների փոքրիկների կողմից ձեռագործ աշխատանքներ հանձնվեցին մեծ բարերարին՝ ի նշան երախտագիտության:
Մասյա Մանթեզը ևս շնորհավորեց վանաձորցիների տոնը՝ նշելով, որ Վանաձորի և Փասադենայի բարեկամությունն արդեն 20 տարվա պատմություն ունի: Նա հույս հայտնեց, որ այդ բարեկամությունը կշարունակվի դեռևս շատ երկար և քաղաքապետին հանձնեց հուշանվեր: Գեղարվեստական ելույթներով համաքաղաքային տոնակատարությանն առանձնակի շուք հաղորդեցին մայրաքաղաքից ժամանած Շուշան Պետրոսյանը, Արսեն Սաֆարյանը, Սիլվա Հակոբյանը, ինչպես նաև Վանաձոր քաղաքի երաժշտական համույթներն ու անհատ կատարողները: Համերգային ծրագիրը շարունակվեց մինչև ուշ երեկո և ավարտվեց շքեղ հրավառությամբ: